睇你哋既討論，令我學咗好多嘢，因為全部係真實個案。
一般講教育既書，多數都係講理論，但實踐上有好多困難，而且阿仔脾氣壞(似我)，脾氣壞既老豆教脾氣壞既仔，真係好難搞。
睇咗你哋既討論之後，我已經改變已往既教育方式，我唔會再用體罰呢個方法，體罰只會令人產生暴力傾向。呢半年來，就算阿仔發脾氣，我都唔會打佢，其實諗返轉頭，都係好小事，只係我同佢喺控制情緒方面比較差。
另外又發現，電視的確有好多暴力畫面，連笑片都會打黎打去，所以唔再比阿仔睇一般既電視節目。
仲有培養閱讀習慣既重要性，喺我之前冇諗過既。
我認為真實個案真係好有參考價值，連"查小欣教育日記"都睇過(我未聽過佢既節目)，至發現原來母親都認為自己個仔係完美既，所以會好盲目下，讀國際學校，一星期學兩個鐘中文，中文水準能夠追上本地小學，根本係自己呃自己。
2 則留言:
SAM511：
睇呢個欄都一樣提醒返我地好多野：＞
之前睇到關於小朋友會咬人打人時，都曾想過回應，因為這曾經令我很困優：
我囡滿1歲時，已進了一間醫院附屬的幼兒中心．最初，只係因為以前作者叫我幫佢手寫篇野，加上老公d同事黎探佢時，發現佢都幾霸道，提議我地考慮早d送佢同其他小朋友玩，學習與人相處，諗住俾佢試吓．
效果卻意外地好．佢返咗幾日學，即學曉行路，送上學時如遇我略有拖延，佢就拉住我話要去返學：＞．
不過，囡囡學講野就不如佢學行咁順利，到近兩歲，仍然講得好少野．而且，當佢玩緊一樣玩具，有小朋友走黎想攞時，佢就出口咬．咬都人地見晒血．搞到我有個禮拜要成日道歉：＜
但幼兒中心既導師叫我唔好重複提呢件事，佢地話可能係因為我囡唔係咁識表達，所以就出口．佢地會留意多d架勒．可能因為咁，難捱既一星期過去後，就冇乜發生過同類事件．後來，囡囡亦冇被投訴過會咬人．
到佢K2，我因為返工，將讀全日班放咗學既佢，寄託響另一個男同學仔家裡．有一排，同學仔既媽咪因公要成日出差，母子可能一個禮拜先聚一兩日，同學仔脾氣變差，成日出手．我就攞返阿囡以前咬人事件黎做例子，請阿囡體諒其他小朋友既錯處．．．
到而家，我囡既脾氣都唔係好好．我多次既實踐發現，硬碰硬，實衰硬．尤其係想佢盡快完成功課，就一定唔可以令佢情緒更加波動．
至於講數玩進退遊戲，老公既策略係，事情未到好嚴重既地步時，已經會企硬晒，再出聲鄭重阻止．呢個姿態，會令到大人自己唔會咁嬲，而細佬亦知其嚴重性．佢以演技處理既方法，又似乎較我到咗忍無可忍至爆出火為佳：＞
csy_ma
寫呢d本來想留言喺"論盡家長論盡教育"，不過佢哋講得太深入，而我sam仔今年至返幼稚園，所以都係多讀少講好d，佢哋可以分享自己既親身經歷，又可以接受對方另一種觀點(雖然有時有少少火藥味)，呢個係好難得既學習機會。
sam仔學講野仲慢，而家2歲半至識講句子，希望今年返幼稚園會學得快d。
張貼留言